json/Second Temple/Apocrypha/Psalm 154/Hebrew/merged.json

{
    "title": "Psalm 154",
    "language": "he",
    "versionTitle": "merged",
    "versionSource": "https://www.sefaria.org/Psalm_154",
    "text": [
        "בְּקוֹל גָּדוֹל פָּאֲרוּ אֱלֹהִים; בִּקְהַל־רַבִּים הַשְׁמִיעוּ תִפְאַרְתּוֹ׃ ",
        "בְּרֹב־יְשָׁרִים פָּאֲרוּ שְׁמוֹ; וְעִם־אֵמוּנִים סַפְּרוּ גְדוֹלָתוֹ׃ ",
        "חַבְּרוּ לַטּוֹבִים נַפְשׁוֹתֵיכֶם; וְלַתְּמִימִים לְפָאֵר עֶלְיוֹן׃ ",
        "הַחְבִּירוּ יַחַד לְהוֹדִיעַ יִשְׁעוֹ; וְאַל־תִּתְעַצְּלוּ לְהוֹדִיעַ עֻזּוֹ וְתִּפְאַרְתּוֹ לְכׇל־פְּתָאִים׃ ",
        "כִּי לְהוֹדִיעַ כְּבוֹד יהוה; נִתְּנָה חׇכְמָה׃ ",
        "וּלְסָפֵּר רֹב־מַעֲשָׂיו; נוֹדְעָה לְאָדָם׃ ",
        "לְהוֹדִיעַ לִפְתָאִים עֻזּוֹ; לְהַשְׂכִיל לְחָסְרֵי־לֵבָב גְּדוֹלָתוֹ׃ ",
        "הָרְחוֹקִים מִפִּתְחֶיהָ; הַנִּדָּחִים מִמְּבוֹאוֹתֶיהָ׃ ",
        "כִּי עֶלְיוֹן הוּא אָדוֹן יַעֲקֹב; וְתִפְאַרְתּוֹ עַל־כׇּל־מַעֲשָׂיו׃ ",
        "וְאָדָם מְפָאֵר עֶלְיוֹן; יְרַצֶּה כְּמַגִּישׁ מִנְחָה׃ ",
        "כְּמַקְרִיב עַתּוּדִים וּבְנֵי־בָּקָר; כִּמְדַשֵּׁן מִזְבֵחַ בְּרֹב־עוֹלוֹת; כִּקְטוֹרֶת נִיחוֹחַ מִיָּד־צַדִּיקִים׃ ",
        "מִפִּתְחֵי צַדִּיקִים נִשְׁמְעָה קוֹלָהּ; וּמִקְּהַל־חֲסִידִים זִמְרָתָהּ׃ ",
        "עַל־אוֹכְלִים בְּשֹׂבַע נֶאֶמְרָה; וְעַל שָׁתֹתִים בְּחֶבֶר יְחִידָיו׃ ",
        "שִׂיחָתָם בְּתוֹרָת עֶלְיוֹן; אָמְרֵיהֶם לְהוֹדִיעַ עֻזּוֹ׃ ",
        "כַּמָּה רְחֹקָה מֵרְשָׁעִים אוֹמְרָהּ; מִכֹּל זֵדִים לְדַעְתָּה׃ ",
        "הִנֵּה עֵינֵי יהוה; עַל־טוֹבִים תַּחְמֹל׃ ",
        "וְעַל מְפַאֲרָיו יִגְדַּל חַסְדּוֹ; מֵעֵת רָעָה יַצִּיל נַפְשָׁם׃ ",
        "בָּרְכוּ אֶת־יהוה; גּוֹאֵל עָנִי מִיָּד צָרִים; וּמַצִּיל‎ תְּמִימִים‎ מִיָּד רְשָׁעִים׃ ",
        "מֵקִים קֶרֶן מִיַעֲקֹב; וְשׁוֹפֵט עַמִּים מִיִּשְׂרָאֵל׃ ",
        "אִוָּה מִשְׁכָּנוֹ בְּצִיּוֹן; בּוֹחֵר לַנֶצָח בִּירוּשָׁלָיִם׃"
    ],
    "versions": [
        [
            "Qumran composition of Ps. 154; recon. by Hanan and Esther Eshel; vocalized by Isaac Mayer ",
            "http://aleph.nli.org.il:80/F/?func=direct&doc_number=000077860&local_base=RMB01"
        ]
    ],
    "heTitle": "תהלים קנ\"ד",
    "categories": [
        "Second Temple",
        "Apocrypha"
    ],
    "sectionNames": [
        "Verse"
    ]
}